NAN LIMA MANSUSUNUD
Inuullit Summy
Sa'ad san agwi iningkaw anu nan singwherjan gway iningkaw nan ana'cha limaay mansusunud. Sa'ad nan ngachancha Pa''ama, Pattuchu, Pakawkagwa, Padochong ja Pa''i'ing. Pa''ama nan panguyu, umadgwa as Pattuchu, umatlu as Pakawkagwa, umapat as Padochong, ja uchichi as Pa''i'ing. Nayagsa'chaay singwherjan tan maid kun manisi'ancha ja anna nan mawhalincha. Achu nan anoncha tan nakakotcha losanay singwherjan.
Osakunay erkaw nasa'it chay amacha kun machanakancha tan amod nan pajogpogna. Sija inggwan chanan ana'na nan ummoycha nanganup san laman ja nangasilim san mammanu' tot ipaischacha san amacha ta ma'aan lagwa nan sa'itna. Naerkagwanan kun as tuyu erkaw, ummamamod nan sa'it chay amacha. Maid kun akammucha as ooncha. Uyay chay inacha naniwhil san amod nan chanagna. Mi'apat kunay erkaw anan chay amacha, "I'ajuud manalit ta sija lagwa nan ma'aanana san allan nan chalit. Ad sa'ad nu ngachanna an cha'aju nan ma'aaya san tuyu chalit ja ma'aan nan sa'it'u, agwad nan ni'a'allasiyay atcho' an sija."
Kun anan chachay mansusunud, "I'ami san sana ad hummu'nag ami as maschom."
Sa'ad san manadchadchayananchaay umoy san gwanggwang asi'a'anan chachay opatay mansusunud maya'sig an Pa''i'ing gway manggwanaon, "Sa'on nan mangaya san tuyu chalit ad sa'on nan mangin'ugwa san atchon amata'u." Gwon kikinno' as Pa''i'ing tan sija nan awhanokan an chicha. Chummakuscha kun san gwanggwang anancha, "Umillong ta'u jan."
Nerpascha kun umillong anancha, "Si'a, Pa''ama, nan umoy umuna manalit ad chayo' nan chanum." Inigkana kun nan antu'us san hoserna, anana, "Sasagkanaonju nan aya'." Nilumtop kun as Pa''ama, chadchaan kun lummosgwa as sija tan achi kun ma'ersod san inaachayo'na.
Namitlu kun lumtop as sija, tumma'chang kun anana an Pattuchu, "Si'aud tan annakaay achiya' kun ma'ersod ad chayo'."
Kun anan Pattuchu an sija, "Awni acha ta sa'on. Pa sijaatchi laya'iyay achi kun ma'ersod san a'it."
Nilumtop kun chadchaan ku hos lummosgwa. Kun anan Pa''ama, "Ka amamod'aot." Namitlu kun lumtop as sija tumma'chang tan achi kun ma'ersod.
Kun anan Pakawkagwa, "Awni acha ta sa'ona. Iillanjuwot manijaya' san chalit."
"Awniyud ta ilanmi.", anancha Pa''ama an Pattuchu. Kun nilumtop kun as Pakawkagwa chadchaan ku hos lummosgwaay mangngosngosangos.
Kun najo'jo'cha losanay manggwanaon, "Ka amamod'a nu'!
Namitlu kun lumtop as sija tumma'chang ahos kun anana amod nan aachayo'na.
Kun nani'gwanan Padochong gway nangilastukon, "Uummakay akammuju. Awni ad ta sa'ona gwot chadchaan ad anna nan aya'." Pinumsu' kunot chaan mangkinagwa san chanum, nernosgwa gway amod nan ngosangosna. Kun na'isorchaay najo'jo' chachay susunudna tan amod nan lastugna. Namitlu kun lumtop as sija tumma'chang kun anana, "Achayo' tuwa' amod."
Kun anancha losanay opat, "Inta'uwot lumajaw tan amod nan achayo'na."
Kun anan Pa''i'ing, "Pachaso'ud umoy."
Kun anan chachay susunudna, "Kanuya'a manay aa''iyut nu ma'ersod'a. Inta'uwot lumajaw ta achi machanakan as amata'u tan takangay sumingwhattang."
Gwon impapilit Pa''i'ing gway manggwanaon, "Pachaso'."
Kun iyyujan chachay susunudna kun anancha an sija, "Mamingsan'a ad pa yakay lumtop ja maid ayam tuma'chang'a ta inta'u."
Nilumtop kun as Pa''i'ing nasasgwo'. Panopanos kun illosgwana nan isun nan ta'yay gway chalit nan acha'ona kun nataag chachay susunudna. Asin kun lumtop gwot panopanos illosgwana hos nan osa kun chinagwat chachay susunudna. Awni kun inapsancha as sija kun asichaot mantutungtungan gway otojoncha as sija tot chichaay opat nan mangaya san atchon amacha. Asin kun lummosgwa as Pa''i'ing gway agwad ahos nan osaay inayana kun tumma'chang as sija. Umoyna kun paognan nan chalitay inayana, pina''uwancha nan wha''agna kun naalinganga kun anancha koon natoy kun tinaynancha as sija san ikid nan chanum.
Manadchadchayancha kunay lumajaw, asi'a'anan chachay susunudna opaton, "Ngachanma'uwa iwhakata'u nu imuson amata'uway maid as Pa''i'ing?"
Kun nanomsomo' as Pa''ama gway manggwanaon, "Iwhakata'uway maagkay pinumsu' san chanum gway achina kun ingwhaka an chita'u. I'ami kun lotpon maid kun inchasanmi an sija ingkana san summingwhattang kun maimaid yakay as sija. Sija nan lummajaw ami ta umalimi iwhaka an cha'aju." Sachi nan tungtungancha.
Hummu'nagcha kun san hoyoycha anancha an amachaon, "Pumigsa'a tan anna nan inghu'nagmiyay tuyu chalit. Humangon'a ta ijapumi nan allacha an si'a ad asimiyot utuwon ad inischam ta ma'aan nan sa'it nu." Hummangon kun as sija gwot inilana nan tuyu chalit nayagsa'anay manggwanaon, "'Gwayyu sannaja ta apuwanju as sa'on."
Ummachanicha kun an sija losan, inilan amachaay maid kun as Pa''i'ing kun anana, "Umman as Pa''i'ing?"
Kun summungwhat as Pa''ama gway manggwanaon, "Amaschi nan na'gwa an sija gway maagkay pinumsu' san chanumay amod nan achayo'na, gway achina kun ingwhagwhaka an cha'ami. I'ami kun tunuchon lotpon maid kun inchasanmi an sija ingkana san summingwhattang. Kun lummajaw ami ta umalimi iwhaka an cha'aju."
Kun nachanakan chachay ama ja inacha gway manggwanaon, "I'aju anapon as sija".
Kun anan chachay opatay mansusunuchon "Ama' achimi inamin inanap nan mampasaikid nan gwanggwangot maid kun inchasanmi. Inan nin nan hugwaja as sija."
Kun ummamamod nan sa'it chay amacha kun achi kun nangan. Kun anan chachay opatay mansusunuchon, "Atchom jan an cha'ami chay ingwhakam ta i'ami anapon as Pa''i'ing."
Kun anan chay amacha, "I'aju jan anapon as sija ad asi'ot atchon."
Gwon anan chachay ana'naon, "Atchom jan an cha'ami ta asi'ami umoy."
Kapu tan ipapilitcha ochagwon nan ingwhakan amacha, anan amacha an chicha, "Cho, atcho' nan losanay la'sun an cha'aju uyay nan losanay ajam."
Pangkop nanchichajaay opatay mansusunud gway sa'ad nu ayancha losan nan paya'sun amacha an chicha, umachajucha san uchumay ili.
Chaan kun mappung nan iwhakawhakan amacha an chicha, nawhanu'nag as Pa''i'ing kun nataagcha losan amamod chachay opatay susunudna. Asinot Pa''i'ing uulliton nan inggwacha an sija. Uyay nan nangaya san chalit ingwhakanaay sija nan nangaya.
Whinumchu' as amod nan amacha kun pinerjawna chicha san hoyoycha kun Pa''i'ing nan nangin'ugwa san losanay la'sun gway inatod nan amana.
Mansubli san: Chanan Uullit ad iklikju nannaja
