Nan Manina
Sa'ad anu chay chugwa manina, wha'sigwotcha anu. Ad maid ku anu asagwan chay huwhai kun laya'i anu nan ana'na.
Osa ad anu erkaw, anan anu chay ana'na laya'i, "Ina, iya' mamangati."
Kun anan anu chay inana, "I'aangkayya ta agwad atchonta as anonta".
Kun ummoy anu chay ana'naot osa anu nan innana. Kun anan anu chay ana' san inana, "Tipjom, ina."
Kun tinipoy anu inana. Nautu ku anu anan anu chay ina say ana'na, "Gwaynu ta manganta." Kun whinanawhanaw anu chay inana kun mangancha ku anu achin anu ka chay ana'na atchan.
Kun anan anu chay inana, "Atchana' kot san pinangatiyam, ka pajanma ekay nangutuutuwa' ja achiya' ekay atchan." Kun sija anu kay ugwan chay inana nan chanumna.
Kun asin anu hos ummoy namangati kun nangka'om anu innana. Kun impatipoyna anu hos an inanaot mautu ku anu hos, ja'o anu atchana as inana say chugwaay innana.
Kun anan anu chay inana, "Atchana' kot san wha"agna lagwa."
Kun anan anu chay ana'na, "Jo'o wha"agna ja achi' ischa."
Kun anan anu chay inana, "Atchana'ud angka san pa"urna."
Kun anan anu chay ana'na, "Pa"urna ja achi' ischa."
Mawhikat kuhos anu, anan anu hos chay ana', "Ina, iya' ahos mamangati."
Kun anan anu hos inana, "I'a peekay."
Kun ummoy anu hos kun kina'omna anu hos, kun anana anu hos an inana, "Ina, langnom nat."
Kun nilangoyangonna anu hos kun inutuutuna anu hosot nautu ku anu, inajakan anu hos chay ina nan ana'na ta mangancha. Kun achin anu hos eka chay ana' atchan chay inana.
Kun anan anu inana, "Atchana' kot san whakangna lagwa."
Kun anan anu chay ana', "Whakangna ja achi' ischa."
Kun anan anu chay inana, "Ka achiya' ekay atchan san ana"u anna san pangapangatiyana."
Osa ku anu erkaw, anan anu chay ina say ana'na, "Matchay'a ta iya' jan mangwhaat." Tan ummapos anu chay inana. Anana anu say ana'na, "Iya' manila as anonta." Kun annaotay siniliwhana anu chay ana'na kun tinaynana anu chay ana'na.
Kun ummoy anu nangkagkakagka'ay san uchumay ili. Umoy ku anu say osa ili, anana anu, "Agwad natoy sinat?"
Kun anan anu chay inchasana ili, "Anna kayya atlun nan erkawnad kanad."
Kun anana anu, "Achaju nat." Manatun anu hos san sawhali ili kun anana anu hos, "Agwad natoy sinat?"
Kun anancha anu hos, "Anna kayya aliman nan erkawnad kanad."
Kun anana anu hos, "Achaju nat." Manatun anu hos san sawhali ili kun anana anu hos, "Agwad natoy sinat?"
Kun anancha anu hos, "Anna kayya agwayun nan erkawnad kanad."
Kun anan anu hos chay madan, "Achaju nat." Kun nanatun anu hos san sawhali ili, kun anana anu hos, "Agwad natoy sinat?"
Kun anancha anu hos, "Anna kayya mi'asijam nan erkawnad kanad."
Kun anan anu hos chay madan, "Achajunat."
Kun anan anu chachay taku, "Ngachan man ekay anapom?"
Kun anana anu, "Ay agwad lagwa." Kun ummoy anu say osa ili, kun anana anu hos, "Agwad natoy sinat?"
Kun anancha anu hos, "Anna kay mijuput ad kanad san erkawna."
Kun anan anu chay madan, "Lagwingonju nu aya' nan sanatay natoy?"
Kun anan anu chay umiili, "Ayta ayam peekay."
Kun inayana anuwot susungsungona anu kay manakub. Aagtuwona anuka chay lachag. Kun anana anu san anna mayungay san ilicha, "Iya' igka san ayangmi." Anana anu, "Ingkaw'a sannaay lujagwan." Kun anan anu chay madan, "Sa'ad nu paaliyo' nan ana"u, inischam."
Kun anana anu say ana'na san hummu'nag ad ugwacha, "Gwaynu ta i'a manigyang as anonta tan maid kun anonta."
Kun ummoy anu chay ana'na kun inischan anu chay lujagwan.
Ummoy ad chay sinana', inaminna anu ayan nan u"uyungna, imatna, ubwhahongna kun tinangwhana anu.
Ad sa'ad anu chay lujagwan, iyagwidna.
Kun hummangon anu chay ana'ot anana anu an inana, "Ina, tan natoja' kayya?"
Kun anan anu chay inana, "Si'aotja, ngachanma na'gwa an si'aannatay natoy'a kunja hummangon'a hosay?"
Kun anan anu hos chay ana', "Ina, iya' ahos mamangati."
Kun anan anu chay inana, "I'a peekay."
Kun ummoy anu hos kun inghu'nagna anu hos nan innana. Gwot anana anu hos an inana, "Ina, tipjom." Kun tinipotipoy anu hos chay inana kun na"ut ku anu anan anu hos chay inana, "Gwaynu ta manganta." Kun inammana anu atchan chay inana san pinangatiyana.
Kun hummayu anu nan angos chay inana kun anana anu say ana'na, "Annaja nan na'gwa an si'a tan sawhali kunan ukalim say nugwanot impaischa' si'a san lujagwan, anna hummayu nan whijagnu". Nerpas.
Mansubli san: Chanan Uullit ad iklikju nannaja
