Sa'ad san agwi iningkaw nan kuwhat ad Israel. Sa'ad nan susurchachun nan iPalistin ummoycha na'akuwhat kun agwadcha nansasagkanaay manuullay san tu'tu' nan whilig gway wha'surcha. Kun nansasagkana hos cha Ali Saul ja chachay ijIsrael. Agwadcha hosay manuullay san tu'tu' san sawhali whilig san whisa'on nan challug. Kun nallotaw nan mangaawha'ay iPalistin san wha'surcha. Cha'oray taku as sija gway sa'ad nan ngachanna Goliat gway iGat. Impo'awna san ijIsrael ananon, “Mampili aju as mangaawha' an cha'aju. Ad sa'ad nu otojona', mammudchachuju nan iPalistin. Gwon nu otojo' as sija, cha'aju nan mammudchachumi. Ipaaliju nan piliyanju ta mallawhan ami!” Chingngorn ku cha Saul ja chanan ijIsrael nan anana, ummogjatcha' amod. Maid kun mawhalin an chicha as lumawhan san sanatay cha'or taku.
Agwad nan osa whawhayuway mangngachan Dabid, sija nan uchichin nan gwayuway mansusunud gway lallaya'i. Sa'ad nan tuyuway chacha'oray susunudna agwadcha mitapi san mangkukuwhat, ad sa'ad as Dabid mangwhanwhantay san ernilun amana ad Betlehem.
Osa ku erkaw whinaun aman Dabid as sija. Kun ingwhakana an Dabid gway mangaya san ma'an as atchona san susunudna ja nan apitancha, ad nanulinay mangipachamag san ma'ma'gwa san kuwhat.
Kun nasasapa hummangon as Dabid san mawhikat. Kun inayana chay ma'an kun lummiggwatay umoy san ampun Ali Saul. Hummu'nag kus sija, inatod Dabid nan ma'an say manuutu. Kun ummoyna inanap nan susunudna. Anna ku ma'aapaapapat as Dabid san susunudna, lummosgwa asin as Goliatay mangkalit san surchachun nan ijIsrael. Inilan ku chanan ijIsrael as Goliat, ummogjatcha kun ummagwidcha. Kun anan nan uchumay lallaya'i an Dabid, “Mailam nannaja cha'oray taku? Atchon Ali Saul nan inawha'nang ja ana'na as asawwon nan mangtoy an sija.”
Kun anan Dabid, “Jo'o ngachan ma anu nannaja iPalistinay mangalikalit san surchachun nan mawhiwhijakay Apudyus?”
Chingngorn ku nan taku nan anan Dabid, nanodcha'chaay umoy mangiwhaka an Ali Saul. Kun impaajag Saul as Dabid. Kun anan Dabid, “Maid otjan umogjat an Goliat. Iya' lawhanon nan annaja taku.”
Gwon anan Saul, “Achim kun loog lawhanon as sija. Ana'a chaan'a kus lumawhan gwon sa'ad as sija incha'cha'ornaay nansurchachu.
Kun anan Dabid, “Sa'on nan mangwhanwhantay san ernilun ama. Ummali ad nan leon, inayana nan uyhun nan ernilu. Kun ummoy'u inaya san tupo' nan leon. Sa'ad nannaja cha'oray taku isun ahos ikay sachiyay leon. As Apudyus gway nanaya'nib an sa'on san leon nan manaya'nib an sa'on sannaja iPalistin.”
Gwot anan Saul an Dabid “I'a ad Apudyus nan tumuyung an si'a.”
Inatod Ali Saul nan ayasagna an Dabid, inatodna hos nan samlitnaay mauser san kuwhat ja nan silupna akaay mauser ahos san kuwhat. Pinachas kun Dabid anana, “Asus'uno' chanas isilup'u. Achiya' kun nanususer san a'ammasna.” Kun inaanna chachay insilupnaay mauser san kuwhat. Kun inayan Dabid nan sur'udnaay mangwhanwhantay san ernilu. Kun nampichit as lima as man'ayuum as whatu san gwail kun inigkana san chu'chu'awnaay mangwhanwhantay san ernilu. Kun inayana nan whersiitna kun ummoyna inahot as Goliat.
Inilan kuchay iPalistin as Dabid gway nansursur'ud anana, “Jo'o asuwa' ta umali'a an sa'onay mansursur'ud?”
Kun anan Dabid gway summungwhat, “Ummali'a ma'akuwhat an sa'onay nanchachaker ja nan'a'aallasag ancha gwachagwad an si'a nan usern nan ma'akuwhat. Gwon ummaliya' an si'a kapu san ngachan Apudyus, gway Apudyus nan susurchachun nan ijIsrael.” Kun inaw'aw Dabid nan osa whatu san chu'chu'awna kun inigkana san whersiitna kun ingwhersiitna. Kun nipunta san itung chay iPalistin, kun natugwad as Goliat. Kun nanodcha' as Dabid gway ummoy nangaya san chakern Goliat kun ingkungsurna san wha'ag Goliat.
Gwot inilan ku chachay iPalistin nan apapuchaay natoy, ummogjatcha kun ummagwidcha. Kun chinogchog chachay ijIsrael chicha kun intoycha chicha losan. Kun inawha' Dabid nan iPalistin san whersiit ja whatu, ja nan tuyung Apudyus.
