Chagka an Aag
Uullit Ma''ay
Sa'ad anus Chagka anana anu an Aag, ''Aag, ngachanna oonta?''
Anan anu Aag, ''Manabawha'ta, ngachan na ijabawha'ta?''
''Lotyotop,'' anan anu Chagka.
''Sija,'' anan anu Aag.''
Inta ayan nan kallis ad chayo' nu ngachan nan mallosod,'' anan anu Chagka.
Anchi'ad anu, ummuna as chagka. Ummuna anu kun lummosgwa inayana anu anchiyay kallis, kallisay whana'iyut gway inayanad chayo'. Lummosgwa ad anana anu, ''I'a misu'at Aag.''
Ummoy anus Aag ad achi kun ma'ersod ad chayo' san chanum.
''Awnita kabo' nan umajam ad chayo','' anan anu Chagka. Anchi'ad anu inayana nan tali. Inigkana anu san agwa'na, ananaon ''Awnita pachuna' nanna whatu san tali.'' Inayana anu nan whatuway cha'or, anana anu ''Umali'a sannajaay achani san lohong ta itoper' na whatu ad ummoy ad chayo'.''
''Oon, sija,'' anan anu Aag.
Anchi'ad pinulig anu Chagka na whatu ingwhagwod Aag san agwa'na chin tali.
Nilumtop nanchiyay Aag gwot achi kun lummosgwa tan natoy na sachi Aag.
Anan anu Chagka, ''Aag, umman ekay lumosgwa an si'a.'' Maid tan natoy na sachi Aag ad chayo'.
Asinaot umoy ayanot anana anu, ''Natoy nan sachi Aag.''Anana anu, ''Nangawha''a, Aag, tan natoy'a.''
Anchi'ad sa'ad anu osa Aag gway huyunna anana anu, ''Nangawha''a, Chagka, tan natoy nannaay sunud'u, jon manabawha'ta hos.''
Anan anu Aag. ''Ngachan na ijabawha'ta?''
''Inta sa kinuwhat,'' anan anu Chagka, ''Intilan nan kangsa'. Sa'ad nu agwad ila' inajaka' si'a, asi'aot umoy.'' Ummoycha sanchiyay kinuwhat. Anchi'ad ummoycha anu mangkagkagka'ay mantangatangadcha anu san anchu gway aju.
Inilan anu Chagka nanchiyay achuway iju'an gway whinumyoy sa ajud ngatu. Anana anu, ''Aag, anchiya kangsa i'a pallu'on ad ngatu. Nu pallu'om nasanatay kangsa towhag na kingana. I'a ad sanchiyay whatug nanchiyay kangsa inab'abnu na sachiyay kangsa tot kuminga.''
Anchi'ad anu umayab nan sachiyay Aag tatangngachon anu Chagka. Niwhatug ad anu Aag sanchiyay ayahonaay iju'an, anan anu Chagka, ''Cho, ab'ahom nan kangsa ta kuminga.''
Inab'ab anu Aag nanchiya iju'an, nansupangona anu. Kumminga anu iju'anot inotwhancha anus Aag. Natoy anu chay Aag kun naotchag tan intoy nan iju'an.
Anan anu Chagka, ''Inamin'u awha'on nan aag.''
Mansubli san: Chanan Uullit ad iklikju nannaja
