Lugwang An Agkung
Uullit Ma"ay
Sa'ad anu cha Lugwang an Agkung, anan anu Lugwang "Agkung, manabawha'ta."
"Ngachan nan ijabawha'ta?", anan anu Agkung.
"Mangwhinni'asta, nu ngachan nan chumakus ad lakuyakud."
"Sija", anan anu Agkung, "Gwon ajo' nan chanum, ajom nan tayantag", anan anu Agkung.
"Oon, sija na ajo' tan sija nan chu'yuso'", anan anu Lugwang. Anchi'ad anu anan anu Lugwang, "Manghotongta agwad ad ma'atlu, asitaot malluki", anan anu Lugwang.
"Oon, umali'a pa sannajaay ikid nan chanum san atlun na erkawna ta akammugwo'", anan anu Agkung. Anchi'ad anu nanchiyay nantuyakancha osa erkaw, ummoy anu' Agkung san aagkuagkungay ingkanad sichi lakuyakud gway ummoyna anu iwhaka ananon, "Saabpas cha'aju gway agkung anna saabpay anan ad Lugwangon, "Agkung agwad'a?" 'Annaa', ananju pay." Ummoyna tinuyag nan Aagkuagkung ingkanad lakud, anchi'ad nansubli san adgwan nan erkawna.
Atluna ad hummu'nag anus Lugwang sanchiyay iningkagwan Agkung.
Anan anu Agkung, "Lugwang agwad'a?"
"Annaa'." "Ngachan nan ijabawha'nu Lugwang?"
"Sa'ad kanan ugwa' pila' ", anan anu Lugwang.
"Ad amana man?"
"Sillihu", anan anu Lugwang. "Ad ngachan mana ijabawha'nu Agkung?"
"Ti'am nan ijabawha'u gway sa'ad nan ti'am umuchilap nu igkata san pingor. Nangina." Anan anu Agkung.
"Oon sija nu agwad umuchilap", anan anu Lugwang. Anchi'ad anu anan Lugwang, "Sa'ad pa nu mangwhilang'a as tuyu chakas'u gway manodcha' san tayantag", anan anu Lugwang.
Nangwhilang anu as Agkung, anana anuwon "Osa, chugwa, tuyu", anana anu. Nallukicha anuway nan manabawha'. Anchi'ad anu chuma"ani ad as Lugwang tot ananaon, "Agkung, agwad'a."
"Annaa' ", anan anu chin Agkung.
"Pa whi'as anu' Agkung gway naa'a"iyut", anan anu Lugwang. Chumo"oya ad anud choya tot whagwhakoona anchiya Agkungon, "Agkung, agwad'a?"
"Annaa' ", anan anu chin Agkung. Anchi'ad anu ummoy, ikad nin ad Tongyay. Naikuwhan anu anchiyay i'in nan Lugwang, namin anu maikuwhan sija nan maila gway achi anu ma'achadchayan. Anchi'ad anu whagwhakoonas Agkung anana anu,
"Annaa' sanna." Uyay anu san ikad ad Bangad achi anu manadchayan as Lugwang, anana anu "Akay'u Agkung tan achiya' ku mawhalin gway manadchayan." Nansubli as Lugwang kun ummoy sanchiyay ikawna.
Sachi ad ummoy gwot whinagwhakana nan Agkung kun anna nanchi Agkung gway iingkaw san ikawna. Anana anu, "Agkung nangawha"a, impaawha'a'." Inatodna chay pila' anu sillihu sanchiyay Agkung. Nappung nan sachiyay uullit nan Agkung ja Lugwang.
Mansubli san: Chanan Uullit ad iklikju nannaja
Iklikju nannaja tot idownlodju nannaja Uullit
