Nan Ummoy Nanganup
Sa"ad anu chay umoy manganup gway mangorrag, umoy ku anu manadchadchayan sa kinuwhat chimmangna anu umasaasu' gway lijang. Ummoy ku anu sanchi lijang, isi'si"imna anu ku inilana nan lujagwan gway mangkowha san uwhin nan osa taku gway ina'awna san uma. Chingngorna anu nan kingan nan lujagwan gway anana anu, "Hi Hi Hi mangwhanguwhangu kingwha'ay uwhi."
Anan anu chay mangorrag gway nangngor gway ummoy nanganup, "Ka agwad nan kingwhana uwhi? Awnit iya' ayan nu ma"ut."
Iingkaw anud pidchong chay mangorrag gway manuullay san kingwhan chay lujagwan. Nassuy anu hos chay lujagwan as a'it gway anana anu, "Awnit asi' iwhalin hos nu awni." Hummangon hos anu gway anana, "Iwhalin'u ad na"ut. Iya' jan massuy ta asi' ayan nu ma"ut."
Na"ut ku anu ummoy chay mangorrag inorsan san mulling say cha'cha'ollag ahosay isuna. Asinaot ayan chay uwhi ku ingwhanatna chay mulling. Ummoyna anu iyagwid say agagya'jan gway aju. Ku ummayab anuwot anona anu chay uwhi.
Awni ku anuwot humangon chay lujagwan, anan chay lujagwan, "Hi! hi! hi! Na"ut nan kingwha'ay uwhi." Ayana anu gwot anguwhana ku anu, "Ka wha'on kus kingwha? Anna pa mulling." Ummoyna anu inanap chay taku susungsungona anu kay innoy chay taku.
Inchasana chay aju gway niwhatug san gwail nan aninniwna. Inilana san chanum chay taku gway umma'allab san aju. Jon aninniwna inilana san chanum.
Umoyna anu ka lotpoyotpon san chanum. Awni ku anu nappog anu ka mallotoyotop tan hummutlu atana. Anana anu, "Awnit mantangacha'ud san aju anna." Mantangad ku anu inilana anna ka chay taku mangamangan. Anan anu chay lujagwan, "Awni'a ta anguwha' nan puun nan aju anna."
Kun anan anu chay taku gway mangorrag, "Adja sima kay inino' sina?"
Inanguwhan anu chay lujagwan nan aju kun a"itan anu kay nangipukod.
Awni ku anu nawwischa anus asuna. Hummu'nag anu wha"iyut gwot ikangorna ku anu chay lujagwan iwwasgwasillig anu chay lujagwan nan asu ku natoy.
Asin anu hos chay taku nawwischa san osa asuna gway cha'cha'ollag. Ummoy ku anu intoyna chay lujagwan kun asiyot lumsa san aju chay taku.
Ku anan chay lujagwan, "Awnit ma'gwaa' a' mato' ta amino' u'aton nan atan nan asum nu umali'a asin manganup."
Ku lummajaw anu chay mangorrag.
Mansubli san: Chanan Uullit ad iklikju nannaja
