Lagkunagwa
Uullit Bernadette Panao
Sa'ad anu as Lagkunagwa san agwi ma'ma'ontog anu huwhai. Maid ku pijaona sasan lallaya'i san intilu Huthut. Amod anu kay mansu''asu''at umoy mamawhallas an sijaay man'a'ontog gway lallaya'i gwon maid anu ka mapiliyana' osa sannachaja lallaya'i. Manchinnupis anu kay lallaya'i anna umuumoy an sija mamawhallas gwon puyus anu ka maid li'nana sannachaja lallaya'i.
Agwad anu osa mangorrag ad Chagwagwa gway mangngachan as Chulliyaw gway nerpas anu ka jummoja gway sa'ad nu manadchayan manur'ur'sur'urd ad mampilapilay. Chinamagna anu mipangkop an Lagkunagwa ku anana anu, "Awni ta sa'on yakay nan umoy mamawhallas."
Lumiggwat anu as Chulliyaw gwot inayana anu sur'urdna. Manur'ur'sur'urd anu mampilapilay gway manadchayan. Niwhatug ku anus Chulliyaw san osa ilin nan osa whawhayu gway ummuummoy mamawhallas an Lagkunagwa, innilan anu Chuyaw as Chulliyaw.
Kun anana anu, "Agwamma ajamanna, Chulliyaw, gway manur'ur'sur'urd san amod nan initanna."
Ku anan anu Chulliyaw, "Iya'ucha ayan as Lagkunagwa' asagwa'."
Gwot anan anu Chuyaw, "Kinuya amanay mangorraka jummoja."
Gwot anan anuhos Chulliyaw, "Igkata nan puspusta tan agwad nan ipusta'ay wha'a."
Kun aysan anus Chulliyaw kun maimiimis anu as Chuyaw gway mamapassi'ut an Chulliyaw.
Simpuyu ili nilausan Chulliyaw gway lamang na'apuspusta san whabwhawhayu, gway nilausanaay man'a'ontokay nilagwilagwing Lagkunagwa. Gwot nichakus ku anus Chulliyaw san ilin cha Lagkunagwaay adadchajuwan. Nanimus anu san taku gway anana, "Agwanna hoyoy Lagkunagwa?"
Gwot initchun anu taku kun ummoy anus sija gwot imuson nan taku ananon, "Ngachan nan maserpum an Lagkunagwa?"
Anan anu Chulliyaw, "Aya' as sijas asagwa'."
Kun asijojo'jo' anu taku manggwanaon, "Kinuya'amanay nan mangorrakay jummoja, anna pay angsan gway whabwhawhayu man'a'ontokay mansu''asu''atot achina kun whayugwon."
Kun maimis anus Chulliyaw gway manggwanaon, "Igka ta'u puspusta tan agwad nan pusta' gway wha'a."
Nilumno' anus Chulliyaw san hoyoy Lagkunagwa kun imwhanatna anu paitna simhohod. Minangilin anu Lagkunagwa tan achina kun akammuway sija pangkop Chulliyaw nan ayanas sija as asagwana. Anan anu Chulliyaw an Lagkunagwa, "Tumipoy'a sannatay pait as isichata." Kun tummipoy anu as Lagkunagwa gwot nerpascha ku mangan imuson anu Lagkunagwa an Chulliyaw ananon, "Ngachamma kakayamanna Chulliyaw gway ummali'a ikad asna ilimi adadchajuwan."
Kun anan anu Chulliyaw "Tan sija kay ummaliya' nan ajaka' si'as asagwa'."
Ku najo'jo' anus Lagkunagwa manggwanaon, "Kaa' maagkassi'a asawwona mangorrakay jummoja, annapay whawhayu wha'onchas mangorrakot lagwingo' kinuya'a man."
Kun asinot anu Chulliyaw ti'ingon nan hoyoy Lagkunagwaot umila'ila anu kas Lagkunagwa manggwanaon, "Ngachamma oom anna Chulliyaw, ta'om pay yakay nu igwa''im nan hoyoy'u, achiya' kun mitunud an si'a."
Asinot anu hos Chulliyaw ti'ingon nan hoyoyna kun initapna anu hos nan ilicha. Kun asi'a'anan anu kay ailijan Lagkunagwaon, "I'a ika mitunud ja ja'o ma'gwa nan amasnatay maagka maitap nan ili ta'u san pangkop an si'a."
Kun manakakayod anu kay as Lagkunagwa kun asinaot anu orsan nan silupna san kissokissoy gway ayisaw. Kun nanusuusing anu hos kun asiyot anu mitunud an Chulliyaw.
Kun asi'a'anan anu kay taku, "Sanat nan inchasam, Lagkunagwa' asagwam tan lagwingom nan man'a'ontog gway whabwhawhayu." Kun sija anu kay oon Lagkunagwa mansayosayot.
Niwhatugcha ku anu san ilin cha Chuyaw gwot inilan Chuyaw, nantayu anu kas sija san whainna an Chulliyaw say ingwhakawhakana an Chulliyaw say laus Chulliyaw gway ummoy nangaya an Lagkunagwa. Gwon sa'ad anu taku asijaamangcha anu mangamaamamang an Lagkunagwa manggwana "Sanat nan inchasam as asagwam gway mangorrakay jummoja tan amod nan impippilim."
Niwhatugcha anu san chayan gway nangillan Lagkunagwa san chanum kun an'annana anu anan, "Iya' uminum jan sanchi chanum." Kun asinot anu Chulliyaw ursungon nan pa''amana. Kun tumoho'toho' anu chanum san pa''amanaot anana an Lagkunagwa, "Wha'on kus maserpu i'a manunger manadchayan sanchi chanum tan annaja nan chanum. Uminum'a yakay."
Kun amod anu kay kubnit Lagkunagwa manggwana "Lagwingo' nat sija ika whayugwo' nan iya' sanchi chanum."
Kun anan anu Chulliyaw, "I'a ampay yakay."
Kun ummoy anus Lagkunagwa gway maimiimis gwot nerpas ku anu uminum ummagwid anus sija. Kun ummagwaagwid anu yakay san adadchajuwan anu kay ummagwichana. Kun humu'nag ku, sija whinu'nagna chay agwachan Chulliyaw gway chayan. Ku natataag anu kas sija manggwanas somsomo'naon, "Kama amaschi na'gwa."
Manadchadchayancha anu hos kun innilan anu hos Lagkunagwa whawhalluwan gway mammanu'. Kun anana anu hos, "Iya'ud ayan nanchi mammanu'."
Kun anan anu Chulliyaw, "Annaja kas ima'ay lummayappoy."
Gwot natataag anu ka hos as Lagkunagwa kun anana anuwon, "Lagwingo' ika uwa."
Chummakuscha anu san ilin cha Chulliyagwot hummu'nag chas hoyoy cha Chulliyaw. Anan anu Chulliyaw, "Mangwhaju'a as ijasugta tan maid ku whinnay." Nangwhaju ku anus Lagkunagwa sinodsod na kunneka anuwot tinopana iyasugna nan chaan nergwo' san kubnitna' amod. Mangan ad anu kas Chulliyagwon inuppuuppa'ana ikay ota gway achi nergwo' ja agwawwiyan nika anu mangan.
Tuyu ku erkaw chas hoyoy Chulliyaw nappog anu kas Chulliyaw san o'oon Lagkunagwa san asugna. Osa ku anu mangmanganot mangamangan cha Chulliyaw an Lagkunagwa, maag anu ka lummaus an chicha nan osa ma'ma'ontog gway whawhayu kun na'asugkajat anu kas Lagkunagwa. Kun ilana ku anus Chulliyaw maid ku anu nabosan nan utina. Kun anan anu somsomo'na, "Akammun nin nosaanna mangorrag nanchi whawhayu lummaus sanna mangamangananmi." Kikinno' anu kas Chulliyaw gway achina ku iwhaka ingkanas imuson jan Lagkunagwa. Kun anan chadlu anu Lagkunagwa, "Ngachan nichi?"
Kun anan anu Chulliyaw, "Tan sanat kay ana''u Juanna gway sija nan iyalla' as asagwana ja'o paa' man asawwon si'aay mangorrag."
Kun amod anu kay whain Lagkunagwa manggwana, "Kammoot achi ingwhakas chamu."
Kun asiyot anus Lagkunagwa merniggwatot umoy manamos san chagsi. Kun inamamma''ana anu kay silupna. Kun asiyot anu umoy mansubli say hoyoy cha Chulliyaw kun anna anus Juan gway maimiimis gway mangahot an sija gway anana anuwon, "Achiya' otjan nampaila anajun an si'a nu achiya' machaku an amaay pa'apa'anam san achi nergwo' gway whinnay."
Amod anu whain Lagkunagwa manggwana, "Tan ana' keekajon sija nan mangasagwa an sa'on. Kamoot wha'on an si'a nan ummali nangajag an sa'on ad ilimi."
Ku anan anu Juan "Umogjata' tan tugwakay lagwingona' ahos."
Chugwa anu ana'cha laya'i ja huwhai gway nerpascha chummacha''or gwon maid anus Chulliyagway natoy. Anan Juan san ana'na chugwa ja san asagwana, "Inta'u lumagwad ilin cha inaju." Anana anu san chugwa ana'na. Kun asilayagsa' anu ana'na chugwa.
Nangwhajucha anus chay'ot tot utuwoncha as agwiton chas umajancha. Hummu'nagcha ku anud ilin cha Lagkunagwa, asi'a'anan anu kay takuwon "Ngachamma huyunnu anna Lagkunagwa."
Gwot anan anu Lagkunagwa, "Ahumerjan'u. Annaja asagwa'ay Juan, annaychaja ahos nan ana'mi chugwa." Amod anu kay lagsa' nan chacha''orn Lagkunagwaot namperticha anu san wha'a. Nerpas.
Mansubli san: Chanan Uullit ad iklikju nannaja
Iklikju nannaja tot idownlodju nannaja Uullit
