Nan Ummoy Nangasilim
Sa'ad anu chay osa madan ummoy anu nangasilim san aju gway agagya'jan gway iigkagwan nan mammanu'. Kun inilana anu nan osa ajuway angsan anu ekay mammanu'. Anana anu, ''Iya' ayan nan langngay.''
Kun ummoy anu nassuy san puun nan aju kun inigkana san wha''agna nan langngay. Anana anu, ''Mammanu' gwayyut tup'onju ongor'.'' Chino'maana anu ku inigkana san langngay.
''Mammanu' gwayyut tup'onju ima'.'' Chino'maana hos ku inigkana san langngay.
Anana hos anu, ''Mammanu' gwayyut tup'onju tupo''u.'' Chino'maana hos ku inigkana san langngay.'' ''Mammanu' gwayyut tup'onju susu'.'' Chino'maana hos ku inigkana san langngay. ''Mammanu' gwayyut tup'onju husug'u.'' Chino'maana hos ku inigkana san langngay.
Anana hos anu, ''Mammanu' gwayyut tup'onju i'i'.'' Chino'maana hos ku inigkana san langngay. Napnu ku anu chay langngay lummajaw anu.
Anan anu chay osa madan, ''Agwamma kay nangallam san mammanu'nu annat?.''
''Inaya' say agagya'jan gway aju.''
Ininom gway nangaya?''
''Ay mamassuyta san puun nan aju ad inigkam nan langngay san wha''agnu.''
Ummoy ku anu chay madan anana anu, ''Mammanu' gwayyut tup'onju puwog'u.''
Ummoy ku anu san puwogna anana anu, ''Umma anu kay umoy san langngay nu'?'' Assi'assinona anu anan, ''Mammanu' gwayyut tup'onju puwog'u.''
Anana anu, ''Ka achi'a umoy san langngay nu'?'' ''Mammanu' gwayyut tup'onju puwog'u.'' Anana anu, ''Awnit iya' lumajaw.''
Anan anu chay osa madan, ''Umma kay inayam nu'?''
''Tan ana' agkoon, 'Mammanu' gwayyut tup'onju puwog'u.' Ilam agkay puwog'u anna namilmiltay.''
''Ay ta ummoy agkay san puwognu chino'maanta ad inigkata san langngay.''
Anan anu chay osa laya'i gway asagwan chay namilmiltay nan puwogna, ''Awnit iya' ta elgano'.'' Elganona ad anu nii'hot kun lummajaw anu. Anan anu chay laya'i, ''Awnit iya' asin.''
Nangaya anu san anchilu ja kaman. Tangwhana ad anu mammanu' lummajaw nan mammanu'. Ingwhalluna anu chay anchilu. Ummoy ku sinipurna anu chay aju.
Hummu'nag ku anu anan anu asagwana, ''Umma chay anchilu nu'?''
''Ingwhallu' pa tan maid yakay ayana''.
Ummoy ku anu chay osa madan gway anna mammanu'ay inayana, inayana anu wha'wha''iyutay anchilu kun insaperna anu san puun nan aju gway nasipur. Angsan anu kay ummoy gway mammanu' san anchilu. Achi ku anu napnu chay wha'wha''iyutay anchilu, tinangwhana ku anu chay anchilu lummajaw.
Anan anu chay madan gway maid ku mammanu'na,
''Agwamma kay nangallam san mammanu'annat?''
''Inaya' pa san sinipurn asagwam gway aju.''
Mansubli san: Chanan Uullit ad iklikju nannaja
