Ayumminga
Sa'ad anu chay osa madan anana anu, ''Awnit iya' mangayumminga ta agwad anon nan ana''u.'' Ummoy ku anu mangayumminga san kinuwhat, inchasana anu osa puun nan ayumminga. Anana anu, ''Ayumminga, nerrum'a?''
Anan anu ayumminga, ''Nerrum nan ayungkajad'u chaan nan ayungkagwis'u.''
Ummoy anu nanadchachadchayan kun inatumna anu nan osa puun nan ayumminga. Anana anu, ''Ayumminga, nerrum'a?''
Anan anu ayumminga, ''Nerrum nan ayungkagwis'u chaan nan ayungkajad'u.''
Awni kun ummoy san whisa'ona gway agwad chay osaay ayumminga gway namingoy nan hokasna. Anana anu, ''Ayumminga nerrum'a?''
''Nerruma','' anan anu ayumminga.
Ummoy anu ummayab ku nanghusug anukas hokasna. Nerpas ku manghusog asinaot langngajon. Napnu ku langngayna lummajaw.
Kun whiniwhillayna san ana'na.
Anan anu cherragcha san inilana, ''Agwamma kay nangallam san ayumminga ta iya' ahos misubli.''
Anana anu say cherragcha, ''Inaya' pas kinuwhat.''
Umoy anu misubli chay cherragcha kun nanagwit as u''uwhaw. Manadchadchayan kun anna anu inchasana unerpo. Inigkana san u''uwhawna kun asinaot ituyuy umoy san kinuwhat. Inchasana ku osa puun nan ayumminga anana, ''Ayumminga, nerrum'a?''
Anan nan ayumminga, ''Nerrum nan ayunkajad'u chaan nan ayungkagwis'u.''
Ummoy ahos nanadchadchayan kun inchasana hos anu osa ayumminga nerrum nan hokasna gway namingoy kun anana, ''Ayumminga nerrum'a?''
''Nerruma''', anan ayumminga.
Inayana u''uwhawna kun ummoy ummayab asiyot manghusug.
Kun nassuy san aju ingkanas hummu'nag nan lujagwan.
Anan anu lujagwan gway opat, ''Ngachan nan mangwhanguwhangu? Pakas whangun chi taku.'' Mantangatangadcha ku anu, inilacha osa madan gway nassuy san pangan nan aju. Anan anu chachay lujagwan, ''Anchiya taku!'' Kun asichaot ayan kun inigkacha san payujud.
Illu'utcha kun intatangngoycha. Anancha anu, ''Taangoy, tangoy ijoy ta'ud Akuhoy.''
Lumi'na ku chay madan anana anu, ''Ngachan ma mangijajancha an sa'on nanna.'' Sa'ad anu tan nawhitil sinomsomo'na chay unerpo san u''uwhawna. Ku inayana anuwot inanna.
Chingngorn ku anu lujagwan nan uman'anot'ot gway iyo''o'anna. Anancha anu, ''Ngachan nan ngayungayuchom?''
Anan anu chay madan, ''Ay uringyusa'.''
Ku nangkigkigsanon chachay lujagwan ognan nan ingacha tan ummogjatcha. Anancha anu, ''Inta'uwot umagwid tan chita'u nan anona.''
Kun napulig chay payujud gwot asiyot lumajaw chay madan.
Hummu'nag kun ad ugwacha anan chay cherragna, ''Umma inayam as ayumminga nu'?''
Anana anu, ''Tan intangoja' pekay san lujagwan tan nassuja' san aju.'' Gwot asiya'ot ilobsanan san anna chay inan'uway unerpo. Kun ummogjatcha san ananchakuwon 'Ngachan nan ngayungayuchom?'. Ana'on 'Ay uringyusa'.' Kun asiya'ot lumajaw.''
Mansubli san: Chanan Uullit ad iklikju nannaja
