Kun inggwan Apudyus nan tangatang, as mangoggwa san chanum. Anna nan chanum san ngatugwon nan tangatang anna ahos nan chanum san manchoya. Kun inilan Apudyusay whayu nan tangatang. Anna nan maschom anna ahos nan whigwhikat, sachi nan mi'aggwaay erkaw. Anan Apudyus, “Manamungon ta'u nan chanumay anna san ngatu ja manchoya. Ta lumosgwa nan mammamakaay luta.” Sachi kun, nginachanan Apudyus nan mammamaka as luta. Kun sa'ad nan chanum nginachanana as whaywhay. Kun inilan Apudyus gway whayu nan luta ja whaywhay.
Kun inggwan Apudyus nan minuya ja lulluut as manangob san luta. Inggwana nan aju, gway humkas. Inggwana chicha as mangatod as hu'or, as mangipaachu san losanay ayasin nan aju.
Kun inilan Apudyus nan inggwana, kun inilanaay whayu. Anna nan maschom anna ahos nan whigwhikat, sachi nan mi'atluway erkaw.
Kun anan Apudyus, “Lumosgwa'aay man'aya'ayasiyay sumilap san langit, as mangimatunan san tayun, as mangimatunan san erkaw chimpu ja tagwon.” Kun inggwan Apudyus nan init as mangipadcha san luta san erkaw. Inggwana nan huyan as sumyag san lawhi. Kun inggwana hos chanan whittuwon. Kun inilan Apudyusay whayu. Anna nan maschom ja anna ahos nan whigwhikat, sachi nan mi'apatay erkaw.
Kun anan Apudyus, “Mapnu nan whaywhay san losanay man'ijatay ingkaw san chanum.” Kun inggwana nan cha'cha'ollanay i'an ja nan a'iyutay i'an ja losanay ayasin nan ingkaw san chanum. Anan Apudyus, “Ma'gwa'aay mammanu'ay tumajap san tangatang.” Inggwana nan losanay mammanu', losanay na'gwa mapaja'an. Ad tummajapcha, ad mapnu nan tangatang an chicha. Kun inilan Apudyusay losanay inggwana whayu. Kun binindisyunana losanay matattakuway na'gwa gway man'ijat ja tumajap. Anna nan maschom ja anna ahos nan whigwhikat, sachi nan mi'alimaay erkaw.
Kun anan Apudyus, “Ma'gwa'aay losanay matattaku as manadchayan san luta.” Kun inggwana nan cha'cha'oray ajam ja wha'iyut as ingkaw san luta. Kun inilan Apudyusay whayu. Kun inggwan Apudyus nan laya'i ja huwhai. Anan Apudyus, “Ituyajan nan laya'i ja huwhai chanan i'an san whaywhay, ja mammanu' san langit, ja nan losanay ayasin nan ajam san luta.” Kun binindisyunan Apudyus nan laya'i ja huwhai. Anana, “Pungwonju nan luta san anana'ju. Ituyajanju nan losanay na'gwa gway ingkaw san chanum, chanan mammanu' san tangatang, ja nan losanay ayasin nan ajam san luta. Ilanju nan lulluut ja minminuya ancha ay'aju gway humkas ad sanatchaja nan ma'anju ja ma'an ahos chanan losanay na'gwaay mangan.” Gwot sachi na'gwaana.
Kun inilan Apudyusay whawhalluwan nan losanay inggwana. Anna nan maschom anna ahos nan whigwhikat, sachi nan mi'anomay erkaw. Kun ummillong as Apudyus san terwhasuna inggwana. Kun binindisyunana nan mi'apituway erkaw, kun inggwana sanatay erkaw as kadto'ay umillongan.
