Sa'ad as Jacob mangorakay nasagwayan as chugwa nan ana'na lallaya'i. Ad ingkaw cha san iliyay mangngachan Canaan. Ad amod nan mamayun Jacob san ana'na laya'iyay Josep nu chanan uchumay ana'na. Kun inatchana as Josep as oberkotay nan'aya'ayasi nan kolorna ta mangipailana san amochay mamayuna. Kun sachi nan ummapsan chanan susunudna.
Awni kun, iningkaw nan chugwa ininop Josep. Kun sa'ad nan ummuna ininopna, manghoto'chaay mansusunud san pajaw. Kun sa'ad nan whinto' Josep, summi'ad kun nili'gwos ja nayyangod nan whinto' chanan susunudna nan whinto'na. Kun sa'ad nan mi'aggwaay ininopna, init, huyan ja nasagwayan as osaay whittuwon nan nayyangod an Josep. Kun ingwhakan Josep sasan susunudna ja as amana nan mipangkop san ininopna. Kun anan amana, “Jo'o sija whayugwomay anan nan mayyangod ami ancha inam ja chanan susunudnu an si'a?” Kun ummamod nan apos nan susunud Josep.
Osa ku erkaw, agwad nan susunud Josep san tayun, kun whinaun Jacob as Josepyay umoy mangila sasay susunudna san tayun ad nanulinay mangipachamag an amana san asasaadcha. Gwot inilan kunan susunud Josep as sijaay mayungay, simsimmo'chaay otojon as sija. Jon anan Rubenay panguyuwon, “Iwhallu ta'u ikas Josep san mammamakaay huhun. Achi ta'u otojon as sija,” tan whayugwon Rubenay takuwon as Josep. Nichakus kus Josep an chicha, inayan nan susunudna nan oberkotnaay nan'aya'ayasi kolorna kun ingwhalluchas Josep san adadchayo'anay huhun.
Awni kun iningkaw nan malla'ya'u san uliyay lumaus san agwachanchaay umoy ad Ejipto. Ad maid kus Ruben san sachi. Kun anan Juda sasan susunudna, “Ila'u ta'us Josep san annaychaja malla'ya'u ta mammudchachu. Kun tinachunan losan chanan susunudna.
Nerpascha kun ila'us Josep, inayan nan susunudna chay oberkotna kun illunongcha san chayan nan ajam. Kun iyoycha san amacha nan oberkot. Inilan kun Jacob chay oberkot, anana kunnu tuttuwa intoy nan atapay ajam as Josep. Kun insimo'na ika nan maichan nan ana'na, ad pakanasan ad nan uchumay ana'naon achina ikay chongyon.
Jon anna ikas Apudyus an Josep. Kun nila'u as Josep san Potiphar ad Ejipto, nan apitan nan pasuyut nan ali. Ad whayugwon Potiphar as Josep, kun inigkanas sijas mangwhantay san hoyoyna. Kun kinuyan nan asagwan Potiphar as Josep, sija nan nangnanggwas ingwhakana an asagwana Potiphar as inggwan Josep an sija. Kun ingwhayud Potiphar as Josep. Kun sa'ad nan apapun nan whayud inigkanas Josep as pangat nan losanay whayud.
Osa ku erkaw, nalingu nan ali san mantataukona ja manuuttuwona. Kun ingwhayudna chicha. Lummawhi kun nanininopcha losan. Whigwhikat kun, ingwhakacha nan inininopcha an Josep. Ad akammun Josepyay tuyungan Apudyus sijaay mangakammu san whayugwon nan ininopay anan. Ad ajanaay mangiwhaka san whayugwon nan ininopchaay anan, kun sa'ad nan manuutu matoy, ad sa'ad nan mantataug lumagwa ad nansilwhi san ali asin. Kun anan Josep say mantataug, somsom'ona' nu ma'gwa an si'a nannaja, tan maid kun inggwa' as lagwing.” Gwot neerkagwanan kus tuyu, nitajun chay manuutus tinapay kun lummagwa chay mantataug kun nansilwhi asin san ali, gway sija chay ingwhakan Josep. Gwon naligwatan chay mantataug as Josep.
Nerrus ku chugwan tagwon, nanininop nan ali, kun maid kun mangiwhaka san whayugwon nan ininopnaay anan. Kun simsimmo' chay mantataug as Josepyay agwad san whayud. Kun iyoy chas Josep san ali. Kun ingwhakan Josep san aliyay sa'ad nan whayugwon nan ininopnaay anan, agwad nan pitu tagwonay manapitanchas achu ad Ejipto, ad nisusu'nub nan pitu ahosay tagwonay uyat. Kun nayagsa'an nan ali an Josep. Kun inigkana sijas kuwhinnachurn nan intilu ili, as manggwas mangiponponancha san subyan nan maapit san sanatay aachugwan nan apit.
Kun tuttuwa chay anan Josepay, amod nan apit san pituway tagwon. Kun pinonpon Josep nan subyaay pakoy. Nerpas ku sachi pitu tagwonay amod nan apit, nisubli nan pitu tagwonay uyat san ailiili. Kun ahus ad Ejipto as agwachan nan amochay ma'an, kapu san inayus Josepay pakoy.
Kun maid kun ma'an ad Canaan, gway agwachan cha Jacob ja chanan anana'na. Kun ingwhaun Jacob nan anana'na ad Ejipto ta umoycha malla'u san ma'an. Kun achin kun Jacob impooy as Benjamin tan umogjat as Jacob as agwad ma'gwa an sija. Benjamin nan uchichiyay ana'na. Nichakus ad chanan aanna' Jacob ad Ejipto, ummoycha an Josep nayyangod, kun sachi chay ininop Josep. Kun illasin Josep chanan susunudna, achicha kun illasin as Josep. Kun nanimus as Josep an chicha san mipangkop san ilicha ja ahumerjancha. Kun anan Josep, “Sipsip aju!”
“Wha'on,” anan chachay susunudna. “Ummali ami malla'u san ma'an.”
Kun anan Josep, “Sa'ad nu whayu aju taku, matchay nan osa an cha'ajud asna ad illajaw nan uchum nan su'munonju san ahumerjanju. Ad nanulin ajud asna ja inagwitju nan uchichiyay sunudju.”
Kun natchay nan osa sunudchad Ejipto, kun nanulin nan uchum ad Canaan. Inamincha kun anon chay sinu'muncha, ingwhakan ahos Jacob sasan anana'na ta manulinchad Ejipto ta umoycha malla'u asin san ma'an. Kun pinayuhusana as Benjamin gway ma'ooy an chicha. “Manulin aju san machaychajagway kuwhinnachur ad Ejipto. Ad Apudyus nan manignay an sija ta ijujanaay nan osa sunudjuway ingwhayudna ad aysan aju losanay whawhayu.” Kun nanulinchad Ejipto. Inilan kun Josep nan susunudna, pinuyungna nan mudchachunaay ijoycha chicha san hoyoyna. Kun naschaaw chanan susunudna san na'atu'chus Josep an chichaay ma'a'an. Kun inatchan Josep chicha san pakoy. Kun ingwhakana san mudchachunaay igkacha san ochon Benjamin nan iinnumana tasa. Kun aysan chachay mansusunud.
Nasi'utcha kus panos, whinaun Josep nan mudchachunaay manu'nub an chicha ad ananaon, “Kajuman a'agwon nan tasaay iinnuman nan Apu'.” Whayugwon Josepay oon nan manulinan nan susunudna, tot iwhakana an chicha nan inatatakuna. Kun nanulin chachay susunudna san hoyoyna.
Kun ingwhakan Josep an chichaay sija chay Josepay sunudcha. Kun ingwhakana an chichaay manulincha ad Canaan ta ajakancha nan losanay ahumerjan Jacob ad Ejipto, ta mawhijagcha ustu. Kun anana, “Ilanju, wha'on kus cha'aju nan nangiwhaun an sa'on ad asna. As Apudyus nan nangiwhaun an sa'on ad asna as mangilisi an cha'aju ja nan losanay taku' san whitil.”
