NA'GWAAN NAN LUHUNG (Genesis 1, 2:1-3)

Sa'ad san chamchamu, inggwan Apudyus nan langit ja luta. Kun sa'ad san luglukina, manghulingot losan nan luta. Kun anan Apudyus, “Pumadcha'a.” Kun napanadcha nan luta. Kun nansinaon Apudyus nan padcha san hulingot. Kun nginachanana nan padcha as erkaw ja nginachanana hos nan hulingot as lawhi. Kun inilan Apudyusay whayu nan padcha gway anna nan maschom ja whigwhikat, sachi nan umuna erkaw.

Kun inggwan Apudyus nan tangatang, as mangoggwa san chanum. Anna nan chanum san ngatugwon nan tangatang anna ahos nan chanum san manchoya. Kun inilan Apudyusay whayu nan tangatang. Anna nan maschom anna ahos nan whigwhikat, sachi nan mi'aggwaay erkaw. Anan Apudyus, “Manamungon ta'u nan chanumay anna san ngatu ja manchoya. Ta lumosgwa nan mammamakaay luta.” Sachi kun, nginachanan Apudyus nan mammamaka as luta. Kun sa'ad nan chanum nginachanana as whaywhay. Kun inilan Apudyus gway whayu nan luta ja whaywhay.

Kun inggwan Apudyus nan minuya ja lulluut as manangob san luta. Inggwana nan aju, gway humkas. Inggwana chicha as mangatod as hu'or, as mangipaachu san losanay ayasin nan aju.

Kun inilan Apudyus nan inggwana, kun inilanaay whayu. Anna nan maschom anna ahos nan whigwhikat, sachi nan mi'atluway erkaw.