Sa'ad as Darius iMedian gway alin nan losanay ili. Pinilina nan nerpaan as chugwampuyuway priprinsipi as mangilintog san lintogna. Kun nampili as tuyu as apapucha as mangilintog sasan priprinsipi. Kun osas Daniel sasan napiliyay apapu. Ad whawhallugwon nan ali as Daniel tan ipapuutna terwhasuna. Ad sa'ad chanan uchumay mallilintog naaposcha an Daniel.
Kun simsimmo'chaay anapon nan manggwaana san lagwingon nan lintogcha. Gwon maid kun osas mangchas as lagwing an sija. Sa'ad as Daniel ipapuutna terwhasuna ancha whayu nan o'oonaay terwhasuna. Kun anan nan osa prinsipi, “Anna nan osa mangichayuman ta'u an Daniel, chongyonju! Anna nan simsimmo''u.” Kun sa'ad chanan mamurhursur an Daniel ummoycha an Ali Darius. Kun anancha, “Apu Ali, manggwa'a otjan as lintog as ma'gwa san tuyumpuyu erkaw gway maid kun osas mallugwayu san whayangna apudyus ahus'a ikay as mallugwayuwancha. Ad sa'ad nan mangigwa'i sannaja lintog miwhallu san agwachan nan leon.” Apu, pilmaam nannajaay nilistaay lintog. Ad Annaja nan ma'gwa as lintog nan iMedia ja iPersia. Gway achi kun mawhalinay mawhaligwan!” “Nan tuyumpuyu erkaw maid kun osas mallugwayu san whayangna Apudyus gwinnu taku, ahusa' ikay. Ad nu ngachan nan mangigwa'i san annaja lintog miwhallu san agwachan nan leon.”
Agwad nan ugwertu san tu'tu' nan hoyoy Daniel. Ad aschi nan whawhallugwona as mallugwayuwana an Daniel.
Akammun Daniel nan a'opgwaay lintog. Gwon as Apudyus nan umuna san whijagna. Whinikatay mamitlu as Daniel mallugwayu an Apudyus. Kun anan chachay mamurhursur an Danielay nangila, “Anchiya!” Kun nanu'yus chaay ummoy san ali. “Chadchadchailon Daniel nan a'opgwaay lintognu! Maserpuway miwhallus sija san leon!” Kun amod nan sangan nan ali tan whawhallugwona as Daniel. Kun inerkawna ikaay manomosomo' nu ngachan nan ininonaay nan mangyos san lintog. Kun napilitan nan aliyay nangipaajag an Daniel.
Kun anana, “Ta'okotnu takuwon cha'a san Apudyusnuway kadto'ay mansilsilwhiyam.” Kun asingerngernger chanan leonay man'ochaw as anoncha. Kun ingwhallun chanan susurchachus Daniel san manghulingotay ingkagwan nan leon. Kun inigkacha nan cha'oray whatu san sagwang nan ingkagwan nan leon kun inghu'hu'cha nan amas manatungay kendel san ikiikidna. Kun intagmod nan ali chay singsingna san amas kendel kun nipapagwat sija nan maid kun osas mangigkat san onob.
Kun nachachannakan as Ali Darius. Lagwingona ikaay nan mangan ancha manchongor san anta. Nilabyawhinaay nan manchanag san mipangkop an Daniel. Kun summingit nan init. Kun nanodcha' nan aliyay nan umoy san ingkagwan nan leon. Issija nin as Danielay matattaku? Kun pin'agwana, “Daniel! Tinaku cha'a san Apudyusnu?” “Ingwhaun Apudyus nan anghelna as mangijum san tupo' nan leon. Ilam! Achiya' kun puyus na'amunitan!”
Kun amod nan yagsa' chay ali ja nayagsa'an ahos chachay leon. Kun sa'ad chachay mamurhursur an Daniel niwhallucha san ingkagwan nan leon kun intugchan nan leon chicha.
Kun nanggwa as Ali Darius as a'opgwa as lintog. Anan nan lintog, “Losan nan taku manchajaw san Apudyus Daniel, tan sija nan mawhiwhijakay Apudyus. Niligtasna as Daniel ta achi matoy san ingkagwan nan leon.”
