Sa'ad san agwi iniingkaw nan osa laya'iyay nangngor san ukud Apudyus. Anana, umali ingkaw san luta nan ana' Apudyus. Kun ummoy Juan impachamag san ailiili san luhung. Kun namati chanan taku san chamag kun sinu'nubchas Juan san gwanggwangay Jordan. Kun whinonjakan Juan chicha san chanum.
Osa kuway erkaw hummu'nag as Hesusay mampahonjag. Apingsan Hesus as Juan. Gwot inilan kun Juan as Hesus ananaon, “Annaja ana' Apudyus.” Nerpas kus sija nahonjakan ummoy nallugwayu san whilikay maid minuya. Kun sachi nan nangabtana an Satanas. Kun maid kun anon Hesus san sachi whilig.
Kun opatpuyu erkaw nan achina kun nanganan kun sinugsukan Satanas sijaay manggwana, “Nu tuttuwa ana' Apudyus si'a mangwhalinom tinapay nannaja whatu.”
Jon anan Hesus, “Wha'on kus ahus nan tinapay as mawhijakan nan taku.”
Kun impailan Satanas an Hesus nan losanay ingkagwan nan luhung kun anana, “Mansilwhi'a an sa'on ta si'a nan mangituyay san luhung.
Jon anan Hesus, “Chajagwom nan Apudyusnu ja ahus as sija as mansilwhiyam.”
Kun iyoy Satanas as Hesus san otop nan Templo ad Jerusalem. Kun anana, “Tumaud'a. Tan achin kun Apudyus ipayuhusay masa'tan nan ana'na.” Jon achi kus Hesus.
Kun anan Hesus an Satanas, “Anan Apudyus achiya' padpachason.” Kun inilan Satanasay achin kun Hesus ma'gwaay mansilwhi an sija. Kun ummachajus Satanas ingkana san whayu chimpu. Kun hummu'nag nan anghelay nanuyung an Hesus.
Kun nanagkulin as Hesus san hoyoyna kun illukina nansuyu san ukud Apudyus. Kun nigwerna' nan chamag gway mipangkop an sija san intilu luhung. Kun sa'ad chanan uchumay lallaya'iyay nangngor san chamag, simsimmo'chaay tunuchon as Hesus. Kun nangngachancha pasuyut Hesus. Sa'ad nan ngachancha, Juan, Santiago, Andrew, Pedro, Philip, Natanael, Tomas, Mateo, Simon, Taddeus ja as Santiago gway ana' Alfeo. Ja anna ahos nan osa laya'iyay nannanmo'ay mitunud an Hesus gway mangngachan Judas. Kun naachern nan pasuyut Hesus nan mipangkop an Apudyus kapu an Hesus gwot whinadnganchas Hesusay mangisuyu san uchum.
Ad iningkaw chanan takuway Pariseo gway mallagwing san tudtuchun Hesus. Ad whayugwonchaay ipakino' as sijaay mansuyu. Jon achicha kun ma'iipakino' sasan pasuyut Hesusay mangigwayagwag san whayuway inggwan Hesus.
Osa ku erkaw, ummoy as Hesus na'abyay san osa iliyay ananchaon Cana. Sa'ad san chimpun nan lagyagsa', namin nan whajas gwot ingwhakan Hesus sasay mantataug tot ugwaancha nan onomay amutuway whatu san chanum. Kun ingwhakana an chichaay umihu'hu'chas a'it. Gwot nangwhalin whajas chay chanum. Kun ummanay sasan mangili.
Nerpas ku sachi, iningkaw cha Hesus ja chachay pasuyutna san aamsan ad Siloam. Iningkaw nan osa laya'iyay na'u'uyapay nijana'. Kun tummubwha as Hesus san luta kun inayana chay natubwhaanay luta kun asinaot igka san atan chay laya'iyay na'uyap kun ingwhakana an sijaay cherrupana san aamsan. Kun inggwan chay laya'i nan ingwhakan Hesus. Gwot manulin kun, anna ilana.
Kun niijoycha chay laya'i san agwachan chanan Pariseo. Kun anan cha an sija, “Nannaja Hesus mangmanggwa ikas nerpu an Apudyus. Annaotay amamod ikas sija san mangalallilaw.”
Jon anan chay laya'i, “Ahus ika' akammu' nan na'uyapa' kun ma'iilaa' san sana. Nu wha'on as nerpus Hesus an Apudyus, achi kun na'a'aan san uyap'u.” Jon whayugwon nan Pariseoway palikatan as Hesus.
Kun chingngorn Hesusay nasa'it as Lasaruway huyunna. Gwot nerpas ku chugwa erkaw, anan Hesus, “Natoy as Lasaru san sana jon takuwo' as sija.” Kun ummogjat chachay pasuyut Hesus tan akammuchaay palikatan nan Pariseo chicha nu chongyon cha uchumay o'oon Hesus. Jon achi kus Hesus ummogjat.
Gwot hummu'nag kus sija san hoyoy Lasaruway huyunna, nanu'yus nan sunud Lasaruway huwhaiyay mangahot an sija. Kun anana, “Apu, sa'ad otjan nu iningkaw ad asna, achi otjan natoy nan sunud'u laya'i. Uyay san sana, atchon Apudyus nan ochagwom.”
Kun anan Hesus, “Mataku asin nan sunudnuway laya'i.”
Kun ummoy cha san lohon Lasaru. Kun inaancha nan tangobnaay whatu. Kun nallugwayus Hesus an Apudyus. Gwot anan Hesus, “Lasaru, gwaynuwot!” Kun lummagwas Lasaru san lohon gway nataku!
Kun angsan nan takuway namatiyay nerpus Hesus an Apudyus. Jon inilan Satanasay annay nan whayu chimpuway mangawha'ana. Kun ingwhakana an Judasay umoy san Pariseo. Sana kun lummagwing as Judas san uchumay pasuyut Hesus. Kun chingngorna anan Satanas. Ingwhakan Judas san Pariseo gway whadngana chichaay mano'ma an Hesus. Iningkaw cha Hesus sasan pasuyutna san kerchin ad Getsemani. Kun ingwhaun nan Pariseo as Judas ja chanan surchachu gway umoycha ilajaw as Hesus. Kun nasaplisaplitan as Hesus ja nasugwitan san sait. Kun nilansas sija san krus. Nerpas kus sija nitajun san krus as sijamay uyas, hummulingot nan langit. Kun anan Hesus, “Annaja nerpas,” kun natoy. Kun inayan nan pasuyutna nan whang'ayna tot ilhoncha.
Neerkagwanan kus chugwa erkaw, ummoy nan huhuyun Hesus san lohonna nallugwayu. Kun nataagcha san inchasan chaay na'aan nan whatuway nitangob san lohon kun maid ku whang'ay say lohon. Osaay anghel nan tummutu'chu san lohon gwot anana, “Achi aju umogjat akammu'ay anaanaponjus Hesus jon maid kus sija sannay. Natakus sija. Ilanjus sija ja ma'aapapat aju an sija asin.” Kun amod nan yagsa' nan pasuyut Hesus san inahotchas Hesus, natakus Apu.
Kun insuyun Hesus sasan pasuyutna nan uchumay mipangkop san lajad Apudyus. Kun anana, “Mallagsa' ta'u tan annaa' an cha'ajuway iingkaw ingkanas pungpung nan erkaw.”
