Sa'ad nan taku san luhung lummu'ucha. Kun inchasan Apudyus nan osa takuway awhabhusan as whayu san luhung, sa'ad nan ngachanna Noe. Kun inajakan Apudyus as Noe kun anana, “Itapo' nan luta ad natoy losan nan taku san luta.” Kun ingwhakan Apudyus an Noe gway manggwa as sija as papur san aju. Kun ingwhakana an sijaay alkitraana nan chayo'na ja lawhawna . “Ad sa'ad as si'a ja nan ananana'nu ancha aassagwacha milisi aju san itap ad mataku aju san papur. Ad nangiperno'a as sinchuwa san ayasin nan ajam, gway la'i ja whai. Ad nanagwit'a as loog nan losanay agwad ad chayo' anon san amochay erkaw.”, anan Apudyus an Noe. Kun ingwhakan Noe san losanay ahumerjanna nan losanay ingwhakan Apudyus.
Mawhikat kun, illukin Noe ja nan tuyuway anana'na lallaya'iyay manggwa san papur. Kun ummoy nan aassagwacha nangaya as anoncha san iingkagwancha san papur. Nerpas kunan amochay anuschaay nanterwhasu, nerpas nan papur nisakana. Kun na'aapapat as Apudyus an Noe asin. Kun anan Apudyus, “Agwad ad pitus erkaw mallukis sana, igka' nan amochay uchan san luta. Ad opatpuyu erkaw ja opatpuyu lawhi nan umuchanana.” Kun anan Apudyus, “Ipaali' an si'a nan la'i ja whai san losanay ayasin nan mammanu' ja ajam, ja losanay ayasin nan umachap san luta. Agwitom chanan ajam san papur ta matakucha.”
Kun nilumno' as Noe san namin nilumno' nan ajam ad chayo'. Kun nilumno' ahos nan asagwana ja anana'na lallaya'i ja aassagwacha. Kun inongwhan Apudyus nan onob nan papur kun illayamanna. Kun nalluki nan uchan. Kun maid kun kummin'an nan uchan san opatpuyu erkaw ja opatpuyu lawhi. Kun choo nguma'atu nan chanum. Kun nanapya' nan papur. Kun nilitupan nan chanum nan whilwhilig. Kun sa'ad nan losanay inggwan Apudyus natoycha san luta. Kun ahus as Noe ja chachay iningkaw an sija san papur as nataku.
Nerpas ku opatpuyu erkaw ja opatpuyu lawhi, sa'ad chay ingwhakan Apudyusay kumin'an nan uchan, tuttuwa kummino' san sachi. Kun mallukiyay chumo'oya nan chanum. Kun nisaad nan papur san cha'orray whilig. Kun inigkat Noe nan tagwan nan papur. Kun impayagwana nan kalapati ta ilana nu natchu' nan chanum san luta. Gwon maid kun inchasan nan kalapati as mummakas luta, kun nanulin san papur. Nerpas kuhos nan pitu erkaw, impayagwan ahos Noe asin nan kalapati. Kun nanulinay nangitatangnger san tuhu. Kun inakammun Noe gway issija nan chanum. Nerpas kuhos nan pituway erkaw, whinaun Noe asin nan kalapati. Kun achi kun nanulin chay kalapati. Inchasana nan makaay mangubhuwana. Kun namaganan asin nan luta. Kun ingwhakan Apudyus an Noe gway lumagwa san papur. Kun lummagwa as Noe ja nan ahumerjanna ja nan losanay ajam san namagananay luta.
Kun nanggwa as Noe as chachattunan as manchajagwan ja manjamanancha an Apudyus. Kun nayagsa'an as Apudyus kun ingwhakana an Noe, “Achi' kun asin ipaali nan itap as mangtoy san matattaku san luta.” Anana, “Erhungnga nan mangilasinan sannaja iwhaka'. Sa'ad nu ilam nan erhungnga san langit, akammugwomay sosom'o' nan ingwhaka'.”
Return to
Children's Bible Stories
